វគ្គបណ្ដុះបណ្ដាលវិជ្ជាជីវៈនិងប្រឡងជើងសាគយជំនាន់ទី១១

១. អំពីវិជ្ជាជីវៈជើងសាគយ

ជើងសាគយ គឺជាបុគ្គលដែលបានទទួលការអនុញ្ញាតតាមផ្លូវច្បាប់ ដើម្បីធ្វើអាជីវកម្មបំពេញបែបបទបញ្ចេញទំនិញពីគយដោយផ្ទាល់ជាមួយរដ្ឋបាលគយ ក្នុងនាមបុគ្គលផ្សេងទៀត។ ជើងសាគយត្រូវមានអាជ្ញាប័ណ្ណដែលឆ្លងកាត់វគ្គបណ្តុះបណ្តាលត្រឹមត្រូវដើម្បីបំពេញវិជ្ជាជីវៈរបស់ខ្លួនក្នុងការសម្របសម្រួលដល់ការនាំចូលនិងនាំចេញទំនិញឆ្លងកាត់ព្រំដែនអន្តរជាតិ ដោយធានាថារាល់ប្រតិបត្តិការទាំងអស់បំពេញតាមតម្រូវការនិងស្របតាមបទប្បញ្ញត្តិជាធរមាន។

តួនាទីសំខាន់ៗ៖

• រៀបចំនិងដាក់ស្នើឯកសារដែលចាំបាច់ទៅកាន់រដ្ឋបាលគយ
• កំណត់ចំណាត់ថ្នាក់ទំនិញនិងគណនាពន្ធនិងអាករបានត្រឹមត្រូវ
• ផ្តល់យោបល់ជូនអតិថិជនអំពីតម្រូវការនានាដើម្បីបំពេញបែបបទគយ
• សម្របសម្រួលការត្រួតពិនិត្យនិងការពិនិត្យរបស់គយ

• ជួយដល់ការទូទាត់ពន្ធ អាករនិងកម្រៃផ្សេងៗ ពាក់ព័ន្ធនឹងគយ។

សារៈសំខាន់ក្នុងពាណិជ្ជកម្មអន្តរជាតិ៖
ជើងសាគយមានតួនាទីសំខាន់ក្នុងពាណិជ្ជកម្មអន្តរជាតិក្នុងកិច្ចសម្រួលពាណិជ្ជកម្មឆ្លងកាត់ព្រំដែននិងខ្សែច្រវ៉ាក់ផ្គត់ផ្គង់ដែលស្មុគស្មាញ។ ការប្រើប្រាស់ជំនាញរបស់ពួកគេបានត្រឹមត្រូវអាចបណ្តាលចំណេញថវិកា កាត់បន្ថយការចំណាយពេលវេលា អនុឡោមភាពតាមបទប្បញ្ញត្តិត្រឹមត្រូវ និងការគ្រប់គ្រងខ្សែច្រវ៉ាក់ផ្គត់ផ្គង់ប្រកបដោយប្រសិទ្ធភាព។

២. ទិដ្ឋភាពទូទៅនៃវគ្គបណ្តុះបណ្ដាល

គោលបំណងនៃវគ្គបណ្តុះបណ្ដាល៖

• ផ្តល់ជូនសិក្ខាកាមនូវចំណេះដឹងក្នុងជម្រៅអំពីបទបញ្ញត្តិគយ ឯកសារនិងនីតិវិធី។
• បង្កើនជំនាញប្រតិបត្តិសម្រាប់ចាត់ថ្នាក់ទំនិញ គណនាពន្ធ និងរៀបចំការបញ្ចូលឯកសារត្រឹមត្រូវ។
• រៀបចំបុគ្គលសម្រាប់ប្រឡងអាជ្ញាប័ណ្ណនៃភ្នាក់ងារនាំចូលនាំចេញ និងការអនុវត្តន៍ជាក់ស្តែង។

គោលដៅសិក្ខាកាម៖

• បុគ្គលដែលចង់ក្លាយជាជើងសាគយដែលមានអាជ្ញាប័ណ្ណស្របច្បាប់
• អ្នកជំនាញផ្នែកដឹកជញ្ជូននិងខ្សែសង្វាក់ផ្គត់ផ្គង់ដែលចង់បង្កើនចំណេះដឹងអំពីនីតិវិធីគយ
• ម្ចាស់អាជីវកម្មឬបុគ្គលិកដែលជាប់ពាក់ព័ន្ធនឹងប្រតិបត្តិការនាំចូល/នាំចេញដែលត្រូវការចំណេះដឹងលម្អិតអំពីបទបញ្ញត្តិគយ។

ប្រធានបទក្នុងវគ្គបណ្តោះបណ្តាល៖ វគ្គបណ្តោះបណ្តាលនេះមានប្រធានបទសំខាន់ៗជាច្រើន ដើម្បីផ្តល់ជូនចំណេះដឹងពេញលេញនិងជំនាញជាក់ស្តែងដែលសំខាន់សម្រាប់ប្រតិបត្តិការគយ។ ប្រធានបទទាំងនេះរួមមាន៖

• បទបញ្ញត្តិគយនិងអនុឡោមភាពច្បាប់៖ ទិដ្ឋភាពទូទៅអំពីស្តង់ដាប្រតិបត្តិការគយអន្តរជាតិនិងបទបញ្ញត្តិជាតិ។
• ឯកសារនាំចូល/នាំចេញ៖ ការស្វែងយល់អំពីឯកសារដែលប្រើប្រាស់ក្នុងពាណិជ្ជកម្មឆ្លងកាត់ព្រំដែនសំខាន់ៗដូចជា អញ្ញាតប័ណ្ណ វិក្កយបត្រពាណិជ្ជកម្ម និងបញ្ជីវេចខ្ចប់ជាដើម។
• អាករនិងពន្ធ៖ ការស្វែងយល់អំពីការចាត់ថ្នាក់ទំនិញ និងការគណនាពន្ធនិងអាករជាដើម។
• វិធីសាស្ត្រកំណត់តម្លៃគិតពន្ធគយ៖ ការស្វែងយល់អំពីវិធីសាស្ត្រកំណត់តម្លៃគិតពន្ធគយ។
• នីតិវិធីបញ្ចេញទំនិញពីគយ៖ ការស្វែងយល់អំពីនីតិវិធីបញ្ចេញទំនិញពីគយលម្អិតចាប់ពីការស្នើសុំការអនុញ្ញាតនានា ការដាក់ប្រតិវេទន៍គយ និងការទទួលយកទំនិញពីគយដើម្បីដឹកជញ្ជូនទៅគោលដៅចុងក្រោយ
• នីតិវិធីពិសេសនិងកិច្ចព្រមព្រៀងពាណិជ្ជកម្មសេរី៖ ការស្វែងយល់អំពីនីតិវិធីពិសេសនានា និងកិច្ចព្រមព្រៀងពាណិជ្ជកម្មសេរីរវាងព្រះរាជាណាចក្រកម្ពុជានិងប្រទេសដៃគូរពាណិជ្ជកម្ម
• ការគ្រប់គ្រងហានិភ័យនិងសវនកម្ម៖ ការស្វែងយល់អំពីការងារគ្រប់គ្រងហានិភ័យ ការធ្វើសវនកម្មក្រោយបញ្ចេញទំនិញពីគយ និងការទទួលខុសត្រូវរបស់ប្រតិបត្តិករពាក់ព័ន្ធ។

ប្រធានបទទាំងនេះមានគោលបំណងបង្កើនជំនាញរបស់សិក្ខាកាមក្នុងការធ្វើការនៅក្នុងនីតិវិធីគយបានយ៉ាងមានប្រសិទ្ធភាព។

លទ្ធផលវិញ្ញាបនបត្រ៖

• សិក្ខាកាមដែលបញ្ចប់វគ្គបណ្តុះបណ្ដាលនឹងទទួលបានវិញ្ញាបនបត្របញ្ចប់វគ្គ ដែលអាចជាប្រយោជន៍នៅពេលដាក់ពាក្យសម្រាប់ប្រឡងអាជ្ញាប័ណ្ណជើងសាគយឬការងារដែលពាក់ព័ន្ធ។

៣. ការសិក្សានិងការប្រឡង

ការសិក្សា៖

• ទម្រង់៖ ដោយផ្ទាល់
• ពេលវេលា៖
  • រយៈពេល ៤ សប្តាហ៍
  • សិក្សាមួយថ្ងៃពេញ ៥ថ្ងៃ/សប្តាហ៍
  • ចាប់ផ្តើមពី ថ្ងៃទី២៥ ខែវិច្ឆិកា ឆ្នាំ២០២៤ ដល់ ថ្ងៃទី២០ ខែធ្នូ ឆ្នាំ២០២៤
• ទីកន្លែង៖
  • សាលាជាតិគយ
  • ផែនទី GOOGLE

ការប្រឡង៖

• ទម្រង់៖ ដោយផ្ទាល់
• ពេលវេលា៖
  • កាលបរិច្ឆេទប្រឡង ថ្ងៃទី២៨ ខែធ្នូ ឆ្នាំ២០២៤
• ទីកន្លែង៖
  • សាលាជាតិគយ
  • ផែនទី GOOGLE
• ទម្រង់និងប្រធានបទសំខាន់ៗនៃប្រឡង៖
  • ប្រឡងអាចរួមមានសំណួរជ្រើសរើសនិងករណីសិក្សាដែលផ្អែកលើច្បាប់គយ នីតិវិធី ចំណាត់ថ្នាក់ពន្ធ និងបទបញ្ញត្តិពាណិជ្ជកម្ម។

៤. ឱកាសអាជីពនិងការរីកចម្រើន

ឱកាសការងារ៖

• ឱកាសធ្វើការនៅក្រុមហ៊ុនដឹកជញ្ជូន ក្រុមហ៊ុនប្រតិបត្តិការនាំចូលនាំចេញ និងក្រុមហ៊ុនពាណិជ្ជកម្មអន្តរជាតិ
• ឱកាសបន្ថែមសម្រាប់ក្លាយជាអ្នកជំនាញក្នុងវិស័យដឹកជញ្ជូន។